Indian Air Force Viral Video | హిమాచల్ ప్రదేశ్ (Himachal Pradesh) లో హిమపాతం జోరుగా కురుస్తోంది. దీంతో మంచు పేరుకపోవడం వల్ల అనేక రహదారులు మూతపడ్డాయి. మారుమూల గ్రామాలకు రాకపోకలు నిలిచిపోయాయి.
మంచు కారణంగా జనం తీవ్ర ఇబ్బందులు ఎదుర్కొంటున్నారు. అత్యవసర పరిస్థితుల్లోను బయటకు రావడానికి కుదరడం లేదు. ఈ పరిస్థితుల్లో ఒక మారుమూల గ్రామంలో 85 ఏళ్ల వృద్ధురాలు పెరాలసిస్ స్ట్రోక్ కు గురైంది.
అయితే హిమపాతం వల్ల రోడ్డు మార్గంలో ఆసుపత్రికి తీసుకెళ్లే పరిస్థితి లేదు. దీంతో ఆ వృద్ధురాలి కుటుంబం, గ్రామస్థులు కలిసి సైన్యాన్ని సాయం కోరారు. పరిస్థితి వివరించడంతో వెంటనే స్పందించిన అధికారులు.. చీతా హెలికాప్టర్ ను పంపించారు.
విజిబిలిటీ తక్కువగా ఉన్నప్పటికీ సైనికులు రిస్క్ చేసి ఆ గ్రామానికి చేరుకున్నారు. అక్కడి నుంచి వృద్ధురాలిని తీసుకుని చండీగఢ్ లోని ఓ ఆసుపత్రికి తరలించారు. సమయానికి వైద్యం అందటంతో ఆ వృద్ధురాలు ప్రస్తుతం కోలుకుంటోంది.
ఈ సందర్బంగా ఆ వృద్ధురాలి కుటుంబం, గ్రామస్థులు సైన్యానికి కృతజ్ఞతలు తెలిపారు. వృద్ధురాలిని ఆసుపత్రికి తరలిస్తున్న వీడియోను ఐఏఎఫ్ సోషల్ మీడియాలో పోస్ట్ చేయగా అది వైరల్ గా మారింది.
