Government Money In Sunnyleone Bank Account | బీజేపీ నేతృత్వంలోని ఛత్తీస్ గఢ్ ప్రభుత్వం ఆ రాష్ట్రంలోని వివాహిత మహిళల కోసం మహతారి వందన్ యోజన పథకాన్ని అమలు చేస్తోంది. ఈ పథకంలో భాగంగా ప్రతి నెల మహిళల అకౌంట్లలో రూ. 1000 జమ చేస్తోంది. ఈ పథకంలో అనర్హులకు కూడా లబ్ధి చేకూరుతుందంటూ ఇప్పటికే ప్రతిపక్షాలు ఆరోపిస్తున్నాయి. ఈ నేపథ్యంలో ప్రముఖ నటి సన్నీ లియోన్ పేరుతో ఉన్న బ్యాంకు అకౌంట్లో కూడా ఈ పథకం నిధులు జమ అవుతున్నాయి. వీరేంద్ర జోషి అనే వ్యక్తి సన్నీ లియోన్ పేరుతో అకౌంట్‌ తెరచినట్లు అధికారులు గుర్తించారు. బస్తర్‌ రీజియన్‌లోని తూలూర్‌ చిరునామాతో బ్యాంక్ ఖాతా ఉందనీ, ఆమె భర్త పేరు జానీ సిన్స్‌ గా పేర్కొన్నట్లు అధికారులు వెల్లడించారు. గత మార్చి నుంచి ప్రతి నెల రూ.1000 చొప్పున ఆ బ్యాంక్ అకౌంట్లో డిపాజిట్‌ అవుతున్నట్లు పేర్కొన్నారు. అయితే ఈ అకౌంట్‌ను సీజ్‌ చేయాలని బస్తర్‌ జిల్లా కలెక్టర్‌ హారిస్‌ సంబంధిత అధికారులను ఆదేశించారు. నిందితుని నుంచి ఆ మొత్తాన్ని వసూలు చేయాలని స్పష్టం చేశారు.
