Patnam Narender Reddy Quash Petition | వికారాబాద్ జిల్లా దుద్యాల మండలం లగచర్ల గ్రామంలో అధికారులపై జరిగిన దాడి ఉదంతం రాజకీయ మలుపు తీసుకుంది.
తాజగా లగచర్ల ఘటనలో ఏ1 ( A1 ) నిందితుడిగా ఉన్న పట్నం నరేందర్ రెడ్డి హైకోర్టులో క్వాష్ పిటిషన్ ( Quash Petition ) దాఖలు చేశారు. ప్రస్తుతం చర్లపల్లి జైలులో రిమాండ్ ఖైదీగా ఉన్న పట్నం న్యాయవాదుల ద్వారా అఫిడవిట్ పంపించారు.
బుధవారం ఉదయం కేబీఆర్ పార్కు ( KBR Park ) వద్ద తనను పోలీసులు అదుపులోకి తీసుకుని, బలవంతంగా కారులో ఎక్కించి వికారాబాద్ డీటీసీకి తరలించినట్లు అఫిడవిట్ లో ఆయన పేర్కొన్నారు. ముందుగా పోలీసులు తన నుండి ఎటువంటి స్టేట్మెంట్ ( Statement ) తీసుకోలేదని, కోర్టులో హాజరుపరిచే 10నిమిషాల ముందు కొన్ని పేపర్లపై సంతకాలు తీసుకున్నట్లు పట్నం పేర్కొన్నారు.
తన నుండి పోలీసులు ఎటువంటి వాంగ్మూలం తీసుకోలేదన్నారు. తనను అక్రమంగా అరెస్ట్ చేసి, కేసులో ఇరికించినట్లు చెప్పారు. కేటీఆర్ ( KTR ) ఆదేశాలతో దాడులు చేయించినట్లు పోలీసులు కట్టుకథ అల్లారని, పోలీసులు చెప్పేదాంట్లో నిజం లేదని తెలిపారు. ఈ క్రమంలో తన స్టేట్మెంట్ ను పరిగణలోకి తీసుకొని విచారణ జరపాలని అఫిడవిట్ లో పట్నం చెప్పుకొచ్చారు.
