Maldives president Muizzu breaks Zelensky’s record by holding 15-hour press conference | మాల్దీవుల అధ్యక్షుడు మొహమ్మద్ ముయిజ్జు ప్రపంచంలోనే అత్యంత పొడవైన మీడియా సమావేశం నిర్వహించి చరిత్ర సృష్టించారు.
శనివారం ఉదయం 10 గంటలకు ప్రారంభమైన ఈ సమావేశం సుమారు 14 గంటల 54 నిమిషాల పాటు కొనసాగింది, దీంతో ఉక్రెయిన్ అధ్యక్షుడు జెలెన్స్కీ పేరిట ఉన్న రికార్డును ముయిజ్జు అధిగమించారు. ప్రపంచ పత్రికా స్వేచ్ఛా దినోత్సవాన్ని పురస్కరించుకుని, పాత్రికేయ వృత్తి యొక్క సామాజిక పాత్రను ఉద్దేశించి ముయిజ్జు ఈ సమావేశాన్ని నిర్వహించారని అధికారులు వెల్లడించారు.
మాల్దీవుల రాజధాని మాలేలో జరిగిన ఈ మీడియా సమావేశం స్థానిక కాలమానం ప్రకారం ఉదయం 10 గంటలకు ప్రారంభమై, రాత్రి దాదాపు 1 గంట వరకు కొనసాగింది. ఈ సమావేశంలో అధ్యక్షుడు ముయిజ్జు కేవలం నమాజ్ కోసం స్వల్ప విరామాలు మాత్రమే తీసుకున్నారని అధికారులు పేర్కొన్నారు.
ఈ సమావేశంలో దేశీయ, అంతర్జాతీయ మీడియా ప్రతినిధులు పాల్గొన్నారు. మాల్దీవుల ఆర్థిక, సామాజిక, రాజకీయ అంశాలతో పాటు అంతర్జాతీయ సంబంధాలు, పర్యావరణ సమస్యలు, పత్రికా స్వేచ్ఛ వంటి అనేక విషయాలపై ముయుజ్జు సుదీర్ఘంగా మాట్లాడారు.
ఈ 15 గంటల సమావేశం ద్వారా ముయిజ్జు ప్రపంచంలోనే అత్యంత పొడవైన విలేకరుల సమావేశం నిర్వహించిన నాయకుడిగా రికార్డు సృష్టించారు. ఈ రికార్డు గతంలో ఉక్రెయిన్ అధ్యక్షుడు జెలెన్స్కీ పేరిట ఉండేది. ఆయన 2019లో 14 గంటలకు పైగా నిర్వహించిన సమావేశం ద్వారా రికార్డు సృష్టించారు.
